Шинэ мэдээ
Монгол Улсаас хоёр дах бичил уурхайн байгууллага Шударга олборлолтын экологийн цэвэр алтны гэрчилгээгээ хүлээн авлаа
Сэлэнгэ аймгийн Мандал сумд бичил уурхайн үйл ажиллагаа явуулдаг Шижир Хишиг нөхөрлөл Шударга олборлолтын стандартын эхний жилийн аудитын шалгалтаа амжилттай давж гэрчилгээгээ хүлээн авлаа.
Колумб Улсад төвтэй Хариуцлагатай уул уурхайн холбооноос хэрэгжүүлдэг Шударга олборлолтын стандартыг хэрэгжүүлэгч бичил уурхайн байгууллагууд олборлосон алт нь химийн хорт бодис ашиглаагүй, хүний эрхийг дээдэлдэг, хүүхдийн хөдөлмөрийг мөлжөөгүй, байгальд ээлтэй үйл ажиллагаа явуулсан гэдгээ гуравдагч олон улсын аудитын байгууллагаар жил бүр шалгуулж баталгаажуулснаар олборлосон 1кг алт тутамдаа 4,000-6,000 ам.долларын урамшууллыг нэмэлтээр хүртдэг.
Шударга олборлолтын экологийн алтны гэрчилгээг гардан авснаар Шижир Хишиг нөхөрлөл нь Ази тивдээ болон Монгол Улсад хоёр дах байгууллага болж олон улсын зах зээлд алтаа худалдаалах эрхтэй болж байна. 2019 оны 1 сарын 15-ны өдөр Мандал суманд зохион байгуулсан гэрчилгээ гардуулах ёслолын үйл ажиллагаанд сумын ИТХ-ын дарга Б.Ганболд болон онцгой байдлын алба, цагдаагийн газар, байгаль орчны газар, МБУНДХ, ТБУТ-ийн төлөөллүүд, бичил уурхайчид оролцлоо.
Европ болон барууны бусад оронд сертификат бүхий эко алтаар үйлдвэрлэсэн эдлэл худалдан авах сонирхол, хандлага нэмэгдэж байгаа тул цаашид энэ стандартыг хэрэгжүүлэгч бичил уурхайн байгууллагын тоо болон, экспортлох алтны хэмжээг нэмэгдүүлэх нь хариуцлагатай уул уурхайг хөгжүүлэхэд түлхэц болох, олон улсын тавцан дах Монгол Улсын нэр хүнд өсөх, нөхөгддөггүй байгалын баялгаа нэмүү өртөг шингэсэн үнээр худалдаалах боломжтой болох юм.
